అంతర్జాతీయ చమురు రవాణాకు అత్యంత కీలకమైన హోర్ముజ్ జలసంధిని తిరిగి తెరవాలన్నా, శాంతి చర్చలు పునఃప్రారంభం కావాలన్నా అమెరికా ముందుగా తమ ఏడు షరతులను నెరవేర్చాలని ఇరాన్ పార్లమెంట్ స్పీకర్ మొహమ్మద్ బాఘెర్ గలీబాఫ్ తెగేసి చెప్పారు. ఖతార్ కేంద్రంగా పనిచేసే అల్ జజీరా ఛానెల్‌కు ఇచ్చిన ప్రత్యేక ఇంటర్వ్యూలో మాట్లాడిన ఆయన, తాము ఇప్పటికే స్పష్టమైన డిమాండ్లను వాషింగ్టన్‌కు పంపామని, ఇక తేల్చుకోవాల్సింది అమెరికా ప్రభుత్వమేనని స్పష్టం చేశారు.
బంతి ఇప్పుడు అమెరికా కోర్టులోనే ఉందని పేర్కొన్నారు. అమెరికా అధ్యక్షుడు డొనాల్డ్ ట్రంప్ మరోసారి ఇరాన్‌పై సైనిక దాడికి దిగాలని భావిస్తే తీవ్ర పరాభవాన్ని చవిచూడాల్సి వస్తుందని తీవ్రస్థాయిలో హెచ్చరించారు. ఇరాన్ అగ్ర భద్రతా సలహాదారు మొహ్‌సేన్ రెజాయ్ సైతం స్పందిస్తూ, ప్రస్తుతం అమెరికాతో ఎలాంటి అధికారిక చర్చలు జరగడం లేదని, తమ లేఖకు వాషింగ్టన్ నుంచి సరైన సమాధానం రాలేదని స్పష్టం చేశారు.
ఇరాన్ విధించిన ఏడు షరతులు
న్యూస్18 ఇంగ్లీష్ కథనం ప్రకారం.. హోర్ముజ్ జలసంధిని తెరవడానికి ఇరాన్ రాజకీయ, ఆర్థిక, సైనికపరమైన కీలక డిమాండ్లను అమెరికా ముందుంచింది. ఇరాన్‌పై విధించిన ఆర్థిక ఆంక్షలను పూర్తిగా ఎత్తివేయడం, విదేశాల్లో స్తంభింపజేసిన దేశ సంపదను విడుదల చేయడం, ఇరాన్ నౌకాశ్రయాలపై అమెరికా నేవీ దిగ్బంధనాన్ని ఎత్తివేయడం ప్రధానమైనవి. యుద్ధ నష్టపరిహారం చెల్లించడంతో పాటు ప్రాంతీయ పోరాటాలను ఆపాలని డిమాండ్ చేసింది. చమురు అమ్మకాలపై ఆంక్షలు తొలగించి, లెబనాన్‌తో కూడిన కాల్పుల విరమణకు అమెరికా అంగీకరిస్తే ఏడు రోజుల్లో జలసంధిని తెరుస్తామని ప్రతిపాదించింది. దీని ప్రకారం ఆరో రోజు హోర్ముజ్ మార్గం తెరుచుకోనుండగా, ఏడో రోజు సమగ్ర శాంతి ఒప్పందంపై చర్చలు మొదలవుతాయి.
అమెరికా స్థావరాలపై దాడుల హెచ్చరిక
ఇరాన్‌పై దాడులు చేసేందుకు ఉపయోగపడే ఏ విదేశీ సైనిక స్థావరాన్నైనా ధ్వంసం చేస్తామని మొహ్‌సేన్ రెజాయ్ హెచ్చరించారు. యూరప్ లేదా మరేదైనా సుదూర దేశంలో ఉన్న అమెరికా మిలిటరీ బేస్ నుంచి యుద్ధ విమానాలు బయలుదేరినా, వాటిని తమ క్షిపణులతో నేలమట్టం చేస్తామన్నారు. తమ క్షిపణులు చేరుకోలేవని భావించే సుదూర ప్రాంతాల్లోని అమెరికా ద్వీపాలను కూడా లక్ష్యంగా చేసుకుంటామని హెచ్చరించారు. ఖతార్, పాకిస్థాన్ దేశాలు ఈ యుద్ధాన్ని ఆపేందుకు దౌత్య ప్రయత్నాలు తీవ్రతరం చేస్తున్న సమయంలో ఈ హెచ్చరికలు వెలువడ్డాయి.
మరోవైపు అమెరికా విదేశాంగ మంత్రి మార్కో రూబియో స్పందిస్తూ, ఇరాన్ ఆర్థిక వ్యవస్థను దెబ్బతీయడంలో ఇప్పటికే విజయం సాధించామని, కాబట్టి ప్రస్తుతానికి మళ్లీ బాంబు దాడులు చేయాల్సిన అవసరం లేదని వ్యాఖ్యానించారు. ట్రంప్ సోమవారం ఖతార్ మధ్యవర్తులతో భేటీ అయినప్పటికీ పూర్తి స్థాయి ఒప్పందానికి ఇంకా ఆమోదం తెలపలేదు. ఇరు దేశాల మొండి వైఖరి వల్ల పశ్చిమాసియాలో ఉద్రిక్తతలు మరింత తీవ్రరూపం దాలుస్తున్నాయి.
