ఏలూరు, జూలై 23 :
ఇటీవ‌లి భారీ వ‌ర్షాలు, వ‌ర‌ద‌ల‌తో ఉమ్మడి తూర్పు, పశ్చిమ గోదావ‌రి జిల్లా అత‌లాకుత‌లం అయ్యాయి. పంట మున‌క‌తో రైతులు తీవ్రంగా న‌ష్టపోయారు. అలాగే తూర్పుగోదావ‌రి ఏజెన్సీ ప్రాంతాల్లో చాలా గ్రామాల‌కు రాక‌పోక‌లు నిలిచిపోయాయి. నిత్యం ప‌చ్చగా ఉండే కోన‌సీమ ప్రాంత‌మంతా నీటి ముంపులో ఉంది;

నిడ‌ద‌వోలు, న‌ల్లజ‌ర్లలో భారీ వ‌ర్షంలోనే తూర్పుగోదావ‌రి జిల్లా క‌లెక్టర్ పి. ప్రశాంతి ప‌ర్యవేక్షణ చేశారు. కాకినాడ జిల్లాలో సామ‌ర్లకోట మండ‌లంలో పంట పొలాల‌న్నీ నీట మునిగాయి. ఏలేరు, తూర్పు డెల్లా పరిధిలో కాలువ‌లు పొంగిపొర్లుతున్నాయి. తూర్పుగోదావ‌రి జిల్లాలోని ధ‌వ‌ళేశ్వరంలో 8.70 అడుగుల నీటిమ‌ట్టం న‌మోదు అయింది. దీనిలో 4.09 ల‌క్షల క్యూసెక్కుల వ‌ర‌దనీటిని 175 గేట్ల ఎత్తి దిగువ‌కు విడిచిపెట్టారు. ధ‌వ‌లేశ్వరం కాట‌న్ బ్యారేజీ వ‌ద్ద మొద‌టి ప్రమాద హెచ్చరిక ఇచ్చారు.

దీంతో కోన‌సీమ జిల్లాలో ఏడు గ్రామాలు ముంపుకు గురుకానున్నాయి. రాజ‌మండ్రి పాత బ్రిడ్జి వ‌ద్ద 9 మీటర్లు నీటిమ‌ట్టం ఉంది. తూర్పు, ప‌శ్చిమ, మ‌ధ్య డెల్టా కాలుల‌కు 4,400 క్యూసెక్కుల నీటిని విడుద‌ల చేశారు. పోల‌వ‌రం ఎగువ కాఫ‌ర్ డ్యాం వ‌ద్ద నీటి మ‌ట్టం 30.600 మీట‌ర్లకు చేరింది. దీంతో దిగువ‌కు 5.87 ల‌క్ష‌ల క్యూసెక్కుల నీటిని విడుద‌ల చేయ‌డానికి సిద్ధప‌డ్డారు.అల్లూరి సీతారామ రాజు జిల్లాలోని రాజ‌వొమ్మంగి, జీకే వీధి, ఎట‌పాక‌, మారేడుమిల్లు మండ‌లాల్లో వాగులు ఉద్ధృతంగా ప్రవ‌హిస్తున్నాయి.

దీంతో చాలా గ్రామాల‌కు రాక‌పోక‌లు నిలిచిపోయాయి. వీఆర్ పురం మండ‌లంలో గోదావ‌రి న‌దీ ప‌రివాహ‌క ప్రాంతాలైన తుమ్మలేరు పంచాయ‌తీ, శ్రీ‌రామ‌గిరి పంచాయ‌తీల్లో నాలుగు గ్రామాల చొప్పున ముంపులో ఉన్నాయి. వీరంత కొండ‌లు, గుట్టల‌పైకి ప‌రుగులుతీశారు. వీరి క‌నీసం అవ‌స‌రాలు తీర్చే నాధుడు కూడా లేడు.చింతూరు మండ‌లంలోని చీక‌టివాగు, సోకిలేరు, కొయ్యూరు వాగు, చంద్రవంక వాగులు ఉద్ధృతంగా ప్రవాహించ‌డంతో దాదాపు 70 గ్రామాల‌కు రాక‌పోక‌లు నిలిచిపోయాయి. కొయ‌గురు వాగు వ‌ర‌ద దాటికి ర‌హ‌దారి కోత‌కు గురైంది. ఏలూరు జిల్లాలో దాదాపు 25 గ్రామాల‌కు రాక‌పోక‌లు స్తంభించాయి. కుక్కునూరు, వేలేరుపాడు మండ‌లాల్లో ప్రజ‌లు తీవ్ర ఇబ్బందులు ఎదుర్కొంటున్నారు. ఉమ్మడి ప‌శ్చిమ గోదావ‌రి జిల్లాలో 40 వేల ఎక‌రాల పంటకు న‌ష్టం జ‌రిగింది. అందులో 2,751 ఎక‌రాల్లో వ‌రి నారు మ‌డులు దెబ్బతిన్నాయి. 20 మండ‌లాల్లో 263 గ్రామాల్లో పంట పొలాలు ముంపుకు గుర‌య్యాయి